یہ کتاب جناب جاوید احمد غامدی کے پردے سے متعلق موقف کی جامع وضاحت پر مبنی ہے، جو اُن کی ویڈیو سیریز”غامدی صاحب کے فکر پر 23 اعتراضات کے جواب میں“ کی قسط 3 تا 12سے ماخوذ اور اُن پر مبنی ہے۔ یہ سیریز اُن اعتراضات کو تفصیل سے زیر بحث لاتی ہے جو عمومی طور پر غامدی صاحب کے نظریات پر کیے جاتے ہیں اور جنھیں روایتی مذہبی نقطۂ نظر کے مقابل میں ایک منفرد تعبیر کے طور پر پیش کیا جاتا ہے۔ اِن مباحث کا محور قرآن، سنت اور حدیث کی روایتی تشریحات ہیں، جنھیں غامدی صاحب نے اپنے اصولی اور اجتہادی زاویے سے پرکھا ہے اور بعض کو جزوی یا کلی طور پر رد کرتے ہوئے اپنی تعبیرات پیش کی ہیں۔
جناب محمد حسن الیاس نے اِن اعتراضات کو نہایت عمدگی اور ترتیب کے ساتھ غامدی صاحب کے سامنے پیش کیا ہے۔ اِن اعتراضات کے جواب میں غامدی صاحب نے نہ صرف اپنی تعبیرات کو مدلل انداز میں پیش کیا ہے، بلکہ روایتی موقف کی وضاحت اور اُن کے دلائل کا تنقیدی جائزہ بھی پیش کیا ہے۔ یہ مباحث علمی استدلال اور بے لاگ تجزیے کی عمدہ مثال ہیں۔
راقم نے اِس سیریز سے”پردہ“ کے موضوع کو منتخب کرکے ایک جامع کتاب مرتب کرنے کی سعی کی ہے، جس میں مباحث کو مختلف حصوں میں تقسیم کیا گیا ہے، نکات کی وضاحت کی گئی ہے، کچھ مباحث کا اضافہ کیا گیا ہے اور اِس کے ساتھ غامدی صاحب کی تصانیف سے متعلقہ اقتباسات بھی شامل کیے گئے ہیں ۔ مزید برآں، جلیل القدر اہلِ علم کی کتب سے حوالہ جات بھی درج کیے گئے ہیں تاکہ موضوع کے مختلف پہلو مزید واضح ہو سکیں۔
اِس کام کی ترتیب و تدوین میں محترم سید منظور الحسن صاحب کی قیمتی رہنمائی مجھے حاصل رہی، جس کے لیے میں اُن کا بے حد شکر گزار ہوں۔
کتاب کی تدوین اورپروف ریڈنگ میں مدیران جناب شاہد رضا، جناب معظم صفدر اور جناب شاہد محمود کی کاوشوں کے لیے میں اُن کا شکریہ ادا کرتا ہوں۔
یہ کتاب غامدی صاحب کی نظر ثانی کے بعد مزید قابلِ التفات بھی بن گئی ہے۔
یہ کام ”غامدی سینٹر آف اسلامک لرننگ، المورد امریکہ“ کے تحت جاری ہے۔ دعا ہے کہ اللہ تعالیٰ اِس اجتماعی کوشش کو قبول فرمائے اور اِسے دینی علم کے فروغ اور حق کی تفہیم کا ذریعہ بنائے۔ آمین۔
10 /جنوری 2025ء ڈاکٹر عرفان شہزاد