عن أبي بلج الفزاري، قال: قلت لمحمد بن حاطب: إني قد تزوجت امرأتين، لم يضرب علي بدف، قال: بئسما صنعت، قال رسول اللّٰه صلى اللّٰه عليه و سلم : ’’إن فصل ما بين الحلال والحرام الصوت [الضرب بالدف^[28]]‘‘.وعنه في لفظ قال صلی اللّٰہ علیہ وسلم: ’’فصل بين الحلال والحرام الدف، والصوت في النكاح ‘‘.(احمد، رقم18280)

’’ابو بلج فزاری کہتے ہیں: میں نے محمد بن حاطب رضی اللہ عنہ سے کہا کہ میں دو عورتوں سے شادی کرچکا ہوں، لیکن میری کسی شادی میں دف نہیں بجایا گیا۔اُنھوں نے جواب میں کہا: یہ تم نے بہت برا کیا، رسول اللہ صلی اللہ علیہ وسلم نے تو فرمایا ہے کہ حلال اور حرام میں فرق شادی بیاہ کے موقع پر گھروں سے آنے والی گانے کی آوازوں اور اُن کے ساتھ دف بجانے ہی سے ہوتا ہے۔اِنھی محمد بن حاطب رضی اللہ عنہ سے بعض روایتوں میں یہ الفاظ بھی نقل ہوئے ہیں کہ آپ نے فرمایا: نکاح کے معاملے میں حلال و حرام کی تمیز جس چیز سے ہوتی ہے، وہ دف اور نکاح کے موقع پر آنے والی آوازیں ہی ہیں۔‘‘

عن علی ابن أبی طالب أن رسول اللّٰہ صلی اللّٰہ علیہ وسلم مر ہو وأصحابہ ببني زریق فسمعوا غناء ولعبًا فقال: ’’ما ہذا ‘‘؟ قالوا: نکاح فلان یا رسول اللّٰہ صلی اللّٰہ علیہ وسلم، قال: ’’کمل دینہ، ہذا النکاح لا السفاح ولا النکاح السر حتی یسمع دف أو یری دخان‘‘. قال حسین: وحدثنی عمرو بن یحییٰ المازني أن رسول اللّٰہ صلی اللّٰہ علیہ وسلم کان یکرہ نکاح السر حتی یضرب بالدف.(رقم14477)

’’حضرت علی رضی اللہ عنہ بیان کرتے ہیں : ایک مرتبہ نبی صلی اللہ علیہ وسلم صحابہ کے ہم راہ بنی زریق کے پاس سے گزرے۔ اِس موقع پر آپ نے اُن کے گانے بجانے کی آواز سنی ۔ آپ نے پوچھا :یہ کیا ہے ؟ لوگوں نے جواب دیا :یا رسول اللہ، فلاں شخص کا نکاح ہو رہا ہے ۔آپ نے فرمایا : اُس کا دین مکمل ہو گیا۔ نکاح کا صحیح طریقہ یہی ہے۔ نہ بدکاری جائز ہے اور نہ پوشیدہ نکاح،یہاں تک کہ دف کی آواز سنائی دے یا دھواں اٹھتا ہوا دکھائی دے۔ حسین نے کہا ہے: اور مجھ سے عمرو بن یحییٰ المازنی نے بیان کیا کہ نبی صلی اللہ علیہ وسلم پوشیدہ نکاح کو ناپسند کرتے تھے، یہاں تک کہ اُس میں دف بجایا جائے(اور اِس طرح اُس کا عام اعلان کیا جائے) ۔ ‘‘